Күһүн уһуур чинчилээх. Баччааҥҥа диэри төһө да туунугэр кыралаан тымныйдар күнүскү өттүгэр арыыйда сылаас күннэр тураллар. Быйылгы сайын өрөспүүбүлүкэ үрдүнэн 392418 тн от бэлэмнэммит. Ону таһынан 27795 тн сиилэс, 10037 тн сенаж бэлэмнэммит. Ол аата кыстыгы туоруурга аһылык баар диэн этиэххэ сөп. Онтон өрөспүүбүлүкэ АПК-гар биир ураты миэстэни ылар «Туймаада» Агрохолдинг хаһаайыстыбаларын билиҥҥи туругунан балаһыанньалара хайдаҕый?
Быйыл атын улуустары кытта тэҥнээтэххэ агрохолдинг хаһаайыстыбалара оттуур ходуһалара үксэ өрүс арыыларыгар сытар буоланнар, сайыҥҥы уу кэлиитэ улахан мэһэйдэри үөскэтэ сырытта. Ол да буоллар хаһаайыстыбалар баар кыахтарын барытын туһанан алтынньы 10 күнүнээҕи чахчыларынан 6096 тн оту, 8503 тн сиилэһи, 1935 тн сенаһы бэлэмнээн кыстыкка наада буолар аһылыктаах киирбиттэр.
Билиҥҥи туругунан хаһаайыстыбалар бары кыстыкка көһөн киирдилэр. Ол курдук агрохолдинг үрдүнэн 3398 ынах сүөһүнү, ол иһиттэн 1596 ынаҕы, бииригэр диэри саастаах 783 уонна биириттэн иккитигэр диэри саастаах 980 борооскуну кыстыкка киллэрбиттэр.
Оттон хаһаайыстыбаларынан биирдиилээн ылан көрөр буоллахха, кыстыкка “Бөртө сылгы собуота” ХЭУо 1103 төбө ынах сүөһүнү, ол иһиттэн ынаҕа 393 төбөнү кыстатар былааннаахтар. “Өлүөхүмэ Кыладабыайа” ХЭУо 859 ынах сүөһүнү, ол иһиттэн 446 ынаҕы кыстыкка киллэрбиттэр. «Туймаада» Экоферма 4 отделениятыгар 996, ол иһиттэн 547 ынах кыстыахтаах. “Совхоз “Новый” АУо быйылгы кыстыкка 440 ынах сүөһүлээх, ол иһиттэн 210 ынахтаах киирбиттэр. Быйыл сайын өҥ буолан үүт ыама ааспыт сыллааҕы көрдөрүүттэн хаалсыбатах. Хаһаайыстыбалар сыл саҕаланыаҕыттан алтынньы ыйга диэри 4249 тн үүт ыан сыллааҕы былааны 91 бырыһыан толорон иһэллэр. Билигин сыл бүтүөр диэри хаалбыт кэмҥэ үүт ыамын былаанын толорорго үлэһиттэр эрэллэрэ улахан.
Онон кыстык саҕаланна. Бу эмиэ туһунан ураты, сыралаах үлэни, күүһү-кыаҕы ирдиир кэрдиис кэм үүннэ.
***
«Туймаада» Агрохолдинг
Читайте также
